مسئلہ:
شرعاً نکاح کی حقیقت بس اتنی ہے کہ ایک طرف سے ایجاب ہو اور دوسری طرف سے قبول، اور یہ دو گواہوں کے سامنے ہو، جو دونوں مرد ہوں، یا ایک مرد اور دو عورتوں کے سامنے ہو،(۱) اس طرح شرعاً نکاح منعقد ہوجائے گا۔
نکاح میں خطبہ پڑھنا، نکاح کا اعلان کرنا، نکاح کا مسجد میں ہونا، نکاح پڑھانے والے کا نیک چلن ہونا، شاہدوں کا عادل ہونا وغیرہ امور، مسنون ومستحب ہیں، اگر نکاح میں خطبہ نہ بھی پڑھا جائے، یا خطبہ میں معروف ومشہور آیاتِ قرآنیہ اور احادیث نبویہ نہ پڑھی جائیں ، یا ان میں سے کوئی ایک چھوٹ جائے، تب بھی نکاح ہوجائیگا۔(۲)
اسی طرح نکاح کو رجسٹر میں درج کرنا نہ فرض ہے نہ واجب نہ سنت، بلکہ یہ قانونی چیز ہے کہ بوقت ضرورت عدالت میں کام دے سکے، اور جھگڑے ونزاع کو ختم کرنا آسان ہو، نفسِ نکاح بغیر اندراجِ رجسٹر کے بلا تکلف درست ہے ۔
الحجة علی ما قلنا :
(۱) ما فی ” تنویر الأبصار وشرحه “ : وینعقد ملتبساً بإیجاب من أحدهما وقبول من الآخر۔۔۔۔۔۔۔۔وشرط حضور شاهدین حرین أو حر وحرتین مکلفین سامعین قولهما معاً۔(۶۸/۴۔ ۸۸ ۔۹۱، کتاب النکاح، بیروت)
ما فی ” الهدایة “ : النکاح ینعقد بالإیجاب والقبول بلفظین یعبر بهما عن الماضی ۔۔۔۔۔۔۔ ولا ینعقد نکاح المسلمین إلا بحضور شاهدین حرین عاقلین بالغین مسلمین رجلین، أو رجل وامرأتین عدولاً کانوا أو غیر عدولاً۔ (۳۰۶/۲، کتاب النکاح)
ما فی ” شرح الوقایة “ : النکاح ینعقد بإیجاب وقبول ۔۔۔۔۔ وشرط سماع کل واحد منهما لفظ الآخر، وحضور حرین أو حر وحرتین۔ (۳/۲-۵، کتاب النکاح)
(۲) ما فی ” الدر المختار “ : ویندب إعلانه وتقدیم خطبة، وکونه فی مسجد یوم جمعة بعاقد رشید وشهود عدول۔ (۶۶/۴۔۶۷، کتاب النکاح)
ما فی ” الفقه الإسلامی وأدلته “ : یستحب للزواج أن یخطب الزوج قبل العقد عند التماس التزویج ۔۔۔۔۔۔۔ وإعلان الزواج لقوله ﷺ: ” أعلنوا النکاح “۔ فإن عقد الزواج من غیر خطبة جاز، فالخطبة مستحبة غیر واجبة۔ (۶۶۱۶/۹۔۶۶۱۸، المبحث الخامس)
(فتاوی محمودیه: ۴۲۳/۱۰۔۶۰۰)